صه تايتنك مثل ميعرف اكثر العراقيين اللي دارسين التاريخ عراقيه الاصل و اني دورت بكتب التاريخ الى ان لكيت القصه الحقيقيه و كلت لازم العراقيين يعرفون الرومانسه اللي جانوا يعيشون بيهه اجدادنه ف اريد الكل يقراها ويقارن بين الحقيقيه وهاي اللي كتبوهه الاجانب ديقلدونه
مع تحياتي
اليوم راح نشوف قصة الحبيبين جاك و روز شلون بدت ضمن فلم تايتنك
المشهد الأول
جاك بالبانزينخانة مال تايتنك ديعامل على قنينة غاز
- بكم هذه القنينة المدعبلة ؟؟؟
- انها ببلاش !!
- لالا هسة انطيك 15000 لك بسرعة مو جدر الباجلة عال نار و خلصت القنينة شنتغدة؟ كركم؟؟ لك فضها
- ماشي انطيني 20000 و اخذها
- عمي براس تايتنك يم ساحة القبطان ب 12000 شنو شفتونا شكر و حلوين عبالكم هنود؟
- شنوو؟
- لا هيج (هراتي بس ما أيعوعي ) كلي تعرف بالسفينة ركّاع؟ ماتل قنادر؟ لقد انثقب حذائي لأنه طفيت الكطف مال الكريفن بالطركة و اريد اصلحة ,, أدكه عال بارد اي شي
- اكو واحد ب Titanic Mall يفرمت طركات و ينصبلك طركة Service Pack 2 و أسعاره زينة و بالمناسبة ترة اذا تريد نفط هم عندي لان هنا الكهرباء بتايتنك مو سوة
- ليش؟
- لأن الكهرباء يشتغل عال رياح اتدور المحركات و الهوة هنا 4 ب 2
- يا للهول!!!! يا للمطبخ!!! يالغرفة الخطار لن اشتري منك شيئا فأنا عاوي و عاض النعال و لا املك شيئا من الفلوس (كلي اكو ابو صيرفة هنا...؟؟)
المشهد الثاني
جاك يتعرف على روز
و مضى جاك يدعبل القنينة برفسات هادئة و مما ساعد على ذلك ان طركة حذائة كانت من باتا مما ادى الى تقليل الاحتكاك و سلامة جعب رجله الايسر و هنا ( ددددممممم ...... هاي موسيقى تصويرية مو صوت عبوة قابل وين كاعدين؟؟(
جاءت روز.............. و أزبهل جاك وانحولت عيناه بحيث صاروا يشمرن يمنة و تمنى لو كان هنالك أبو ميزانية و بلنص من الشيخ عمر ليعيد اليه توازن عيناه اللتين سيطرت عليهما هذه الملاك ثم اتخربط بحيث زوّع عال جاكيت البازة اللي جان لابسه من الدهشة
ما هذا الملاك؟؟ ما اجملها بأغنية أم شامة تعبيرا عن اعجابه بها
كانت روز تلبس عباية سودة امشككة (طالبتها من عركة) و نعالا لازورديا ابو الاصبع و كانت تحمل 12 كرصة خبز اشترتها من (افران الحاج ابو تايتنك) فران السفينة الاشهر (لي هسة ما منعلس) و تعلج بعلج كبير و تطكطك العلج بحلكها بكل دلال عبد العزيز (علج المخبل ترس صماخة) و اخذت تنظر الى جاك بفضول و هية تسأل نفسها (ياااي شكد حلووو احلى من كارتون توم و جيري بلكت يجي يخبطني من اهلي ) و فكرت كسندريللا ان تنجبحو أرضا فتتعثر بوصلة مال مسح فتترك نعالها يسقط بالكاعو ليظفر به أميرها (جاك ابو خشم الاعوج) لينالها حبيبة له
- هلو شلونج ممكن اتعرف عليج اني معجب
- معجب لو قاموس؟؟
- لا قاموس مال حلاقة
- حلاقة عاطفية؟؟ حلاقة زمالة؟؟
- شنو زمالة شنو صخلة لج بسفينة كاعدين لو بزريبة امشي طلعي جوة (لأن همة أصلا برة)
- لك انتة صدك ما تستحي طلكني يللا
- ولو احنا اصلا ما متزوجين بس انتي طالق
روز راحت الى أمها أيزيتا تبجي و تلطم و الحاج ابو روز (حجي خلف شنتوف) راد يسويها كعدة مال فصل (فصل الربيع لأن الجو حلو ممطر يعني على عجاج و حالوب يعني جو استوائي مال اسكيمو) المهم يابه فظوها للسالفة و اتفقو انه صار سوء فهم و بعد العداوة صارت حبيات و غراميات
المشهد الختامي
جاك ديمشي و يكرز حب و يوكع بالكاع (اي عمي حقة هسة ليش ما ايوكع عال كاع قابل تايتنك مال خللفة؟؟ لو معامل عليها بالنهضة؟؟ ) وأذا هناكة فد بستوكتن جانتو بالكاعي مذبوبتو عبالك واحد محوسمها و وكعت من ايدة (اي لعد قابل شايلها برجلة؟؟) و اذا جاك جرررب اتعثر بيها و سجل بيها كوول ولا اجمل اهداف اللاعب السعودي نشأت بنباستين بالستينات على جامايكا و وكع بالكاع و كام يصيح الحكوولي اويلي ... اااخ كصتي .... لقد أصبت في مقتل لقد انجرحت كصتي و كام يطلع منها الدمائو ( اي طبعا يطلع دم لعد شيطلع سفن؟؟)
أجتة روز و كللتله : ثول يا حبيبي جا غير تنتبه مو اليوم زوجي شطلعك؟
- لا يا حبيبتي انها تلك البستوكة اللعينة كم أمقتها لعد وضعوها امامي لكي اتدعبل و انجبحو بالكاعي حتى حبنا يعض الطركتو ( ديهذري من ورة الوكعة خصم الحجي)
- والله لو كانت بستوكة اللورد ويلسون جفجينكو نفسه فأنهم لم يمنعوننا عن بعض و لتسقط كااافة بساتيك العالم
- لقد انعوجو خشمي حتى صار كأنه عوجية مال بيبيتج فهل انتي بعدجو قابلة بيه كزوج الج رغم هاي الطركاعتو؟؟
- نعم و نعمين و 3 انعام سالوسة يا حبيبي فأنتي بألنسبة لية كأنك قنينتو غاز توها متروسة ولن أبدل ولا حتى ب تنكر نفط ابو 120000 لتر قطر سريع الأشتعاط
- بورك فيكي حاتة نجيبة و بنتون مؤدبة و سيبقى حبنا مثل شي بكة عراقنا... ويانا وين ما انروح
- هلم بنا الى خياطة صديقتي تخيط لك كصتك وتجعلو لك سحابا فوق حتى لا ينفتح الجرح
- كلاا اني افضل الدكم ( و هنا موسيقى تصويرية ما اعرف شنهيا بس اتوقع مال يا كاع ترابج كافوري)
- حبيبي جاك لا تنسى موعدنا في الخرابة اللي بنهاية تايتنك حيثو الاجواء البوتفليقية الرائعة و سأجلب لك ما تتمنى هدية حبي لك
- جدر دولمة؟؟ تبا لها انها تصيبني بالاسهال يا حبيبتي ياحبذا لو كانت صينية طاطلي من صنع يدي أمك الكونتيسة نشمية
- حبا و طاعة يا مولاي جاك و لكني ساتأخر اليوم لأننا نريد أن نفرش الزوالي في كابيتنا لأن السفينة تتجه الى منطقة البحار الباردة (أجة الشتة) و يجب ان نشتري سخانا نفطيا جديدا ( ابو ال 10000 مستعمل من سوك تايتنك القديم)
- حسنا يا حبيبتي كنت أتمنى ان ابعث لك بقبلة هوائية لكن حلكي متروس عمبة اخاف عليكي من الرائحة الفتاكة فهي مهلكة لك
- روح غسل حلكك ولك مو ريحة العمبة صارلها شهرين شنو تشرب العمبة بكصبة؟؟ والله موتتني
أخيرا,, غرق السفينة
و هنا بدأت تايتنك تهتز بعنف كأنها منغولي و ركب مرجوحة و صارت روز تنجبح كل مترين و هية تقول
- لك هاي شنو؟؟ سيارة مفخخة بنص السفينة يبووووووووووووووووووووو
- لا حياتي شنو مفخخة وين كاعدين بالعراق؟؟ لا انها أغلب الظن ديناصور تاه من امه و صعد هنا
السفينة تغرق انجو بحياتكم,,,,,, السفينة تغرك ,,,, الطركاعة دا تغرك
وقف الكابتن صيهود مسؤول تايتنك و هو يقول ساعة السودة على هال فيتر المتريع و يكللي بس بلكات لك يا بلكات لك يا عزة بعينك مو حتى الدشبول مال تايتنك انترس مي عزززة الحك اخذ الاجازة و السنوية خاف يلزمني ابو مرور بجزيرة صخام نعلى على ساعة السودة اللي صرت بيها كابتن شنو كابتن ؟؟ اي قابل أحمد راضي أني؟؟؟ مو جنت دوّار افتر عال قواطي الفارغة مال سفن و بيدي كونيتي معزز مكرم نعلى على و التفت الى العالم الواكفة وراه وصاح بأعلى صوته
ياقوم,,,, ولكم تايتنك أنعلسسسسسسسسسسسسسست
- ولج روز
- ها؟؟
- و زقنبوت اكو وحدة اتكول الحبيبها ها؟؟ و وجع المهم مو موضوعنا اكلج شنو ماطرة؟؟
- كلا يا حبيبي لم السؤال؟؟
- لج اشو الكاعية كلها مي ؟؟ شنو المجاري مال السفينة طافحة؟؟
- لا يا حبيبي لا اعتقد لأن أمانة تايتنك شغلها مضبووط
- وج لعد اكو بوري مكسور بالسفينة وج غركنااااااااااااااااااااااااااااااااا
و هكذا راح جاك و روز بالزلك
الخميس ديسمبر 10, 2009 6:30 am
