كيف تصطادين تمساح دون اللجوء للأساليب المعهودة والسقيمة..؟؟
للاجابة على هذا السؤال اليك مايلي
أهم نقطة :اللصقي بالعجوز اللي حاطه عينك على ولدها ثم نفذي مايلي :
1-خليك مع أمك لاتروحين مع البنات وتستهبلين ماورى مااستهبلتي اصبري عنهم كم شهر الى ان تتم العملية
2-امشي وانتي حاطة راسك بين كتوفك لاترفعينه أبدا..مهما يصير
(خلي الفكس دائما في متناول اليد ) علشان يقولون مؤدبة ومو متكبره
3-كلمة خاله خليها على لسانك وخاصة لأم التمساح علشان تحس
بنوع من التميز عن بقية العجايز .
ملاحظه / لامانع تنادين وحدة ثانيه بخاله
عشان إذا مانجحت الخطه مع العجوز نمبر ون تنجح مع الثاني اتبعيها
كخطة احتياطية (يعني سبير )
4-إذا بدت أمك تتكلم انغزيها بكوعك عشان تدخلك بالموضوع حتى لو
مالك داعي تطبيقا للمثل (كثر الدق يفك اللحام)
أدري إن المثل ماله داعي بس مالقيت غيره
5-اخوانك الصغار لاحقيهم و وراهم وين مايروحون حتى لو مو من عادتك بس تصرفي معهم كأنك أمهم
لأن هذا يوحي بما لايدعو مجال للشك عند العجوز بأنك حريصه على ذريتك (جعلهم عقبك)
6-مهما أكلت أمج من أكله زينه خليها تقول :نفس الاكله اللي تسويها بنتي (حتى لو الاكل من المطعم الصيني أو المكسيكي )
7-اذا جيتي بتمدين ايدك قولي آه وآه و خلي أمك تقول :قايلة لك وأنا أمك لاتنظفين جدران الفيلا الخارجيه بس أنتي الله يهديك ذابحتك النظافه
(ايه طيب..اجل بتنظفين جدران الفله؟؟نظفي غرفتج أول اللي تقولين ثايره فيها قنبله ذريه
8-دايم ارتزي كأنك بالعة قصبه علشان ماينقص من طولك ولا سنتيمتر (للقصيرات فقط) هههههههههههه
-اذا تكلموا الحريم عن الزواج اكتمي نفسك لين تحمر خدودك علشان يقولون البنت تستحي ومالنا حق تكلمنا عندها (بس لاتكتمين نفسك مرة أخاف تروحين فيها وأصير قتلت نفس بغير حق)
10-مهما كان موضوع الحوار حماسي لاتبدين رأيك وخليك مثل الطرما لأن اللقافه تجيب أجل الخطه ..
11-شعرك افرديه لين يتحسحس لاتخلينه طاير وشوشه مهما كانت الموضه
لأن العجايز مايدورون الا اللي شعرها ناعم.. والا ياعمري اللي شوشتها طايره ماحد يلتفت لها
12-إذا أدلت العجوز (أم المتوهق) بأي رأي سواء كان سياسي أو وطني أو اقتصادي وافقي عليه حتى لو هو ماسخ وماله داعي..<
13-في العروس لاترقصين اربضي واقضبي ارضك واعتبري الرقص عيب وشق جيب
14-اذا جا طاري السوق وطبعا هو لازم يجي الطاري لأنه ملح الجلسه عند الحريم خلي أمك تقول:
بناتي مايطلعون للسوق أغراضهم أبوهم يجيبها (وانتي شكلك مقطعه السوق تقطيع ) <
احتمال وارد الحدوث :ممكن تكون العجوز مخططه على بنت غيرك لكن بعد النقاط السابق ذكرها بتغير رايها وتخطط عليك
الحين بتكون العجوز وقعت باالفخ
نرووووووووح للتمساح الحين
مشخص بشماغ بعد مو سهل ههههه<
اهجدي في بيت أهلك ولاعاد تطلعين واذا جاء المعرس بيشوفك خلي أبوك يقول له
والله ودي تشوف البنت بدون ماتدري عشان تأخذ راحتك وانا عمك
وبعدين تشوفها على الطبيعه علشان ماتقول بعدين غشيتوني
(ايه هين ياالشايب لو يحصل حطيت بدالها باسكال مشعلاني والا اليسا
وقبل يجي اليوم اللي بيشوفك فيه بحوالي اسبوع أو أكثر (على حسب شين ويهج )
ا من مشغل لمشغل (صبغه ،فرد،تنظيف بشره،...الخ) لاتخلين على روحك قاصر
ولما يجي التمساح خلي أخوك يوقف بجنبه عند الشباك علشان مايطول بالتبحلق ويبان المستخبي وذلك تطبيق لنظرية اللمحة ذبحة
بعدها عاد كيف بيشوفج هذي عليج مو كل شيء بعلمج اياه دبري عمرك
بس خلي أبوك في نهاية المشاهدة يقول:العذر والسموحه وأنا عمك
ترا (البنت حوسه (مع انك طاقه كل زينك بس يعني اني في هاللحظه الولد بينط على راس أبوك بيشووفك وعلى باله انك ماتنتي متكشخه خخخخخخخخخ
يشفط مخه وبيقول متى العرس ياعم (اللهم ارحمه فقد كان ولدا بار بوالديه )
عاد الله يوفقك ولاتنسينا من حلاو العرس والكليجا واياني واياك تعلمين التمساح حقك من اللي معلمك هالعلوم ..
**تحذير:
بعدي عن أمهات العيال اللي متعلمات راعيات الشنطه مثل لون الجزمه لأن هذولي يبيلهم خطط بعيدة المدى
**نصيحه:<
ادري انه صاحباتك بيلاحظون التغيرات المفاجئه اللي صارت لك واذا سألوك قولي لهم :انك خلاص انسانه عرفتي درب السنع
تدرين ليه؟خوفا من سرقة الفكرة الادبية
يا الله ابي النتايج الزينه ان شاء الله
لاتفشلونا عاد شدو حيلكم احسن ما تعنسووووون وتقعدون بالبيت
السبت يناير 30, 2010 11:03 am
